古蹟岌岌可危 保育望天打卦
古蹟之所以珍貴，皆因年月久遠，歷盡滄桑，一磚一瓦，一柱一木，好似光陰一樣，無咗就無咗，再難彌補。既然係咁，官老爺係咪應該着緊保護古蹟呢？理論上係，不過實際上無，呢嗱，又有古蹟慘遭蹂躪，搞到古蹟變危樓嘞！
呢幢破損古蹟係洪水橋廈村楊侯宮，有二百幾年歷史o架嘞，可以話係一座歷史活化石。可惜五月一場黑雨，楊侯宮天降橫禍，被倒塌大樹插穿屋頂，出現多處破洞，而最令人心痛嘅係，事隔兩個月，毀壞地方居然仲未復修，屋頂只係求其搵張帆布覆蓋，任由風吹雨打，日曬雨淋，情況好似一個老人被遺棄，一日比一日衰弱，頭禿齒落，風燭殘年。
港產官僚唔通畀黑雨淋壞腦？設身處地諗吓，如果你哋畀樹枝插穿頭頂，流血流到啪啪聲，會唔會是但搵塊膠布黏住個頭算數，會唔會等幾個月至去治理？古蹟百年，垂垂老矣，軀殼比人體仲脆弱，磚剝瓦墮，柱毀木蝕，救得幾多得幾多，點能夠任由毀損，望天打卦o架？官老爺咁樣保育，毀育就差唔多！
洪水橋新發展區今日公布初步發展大綱圖，區內有十座法定古蹟同歷史建築。楊侯宮損毀失修，其他歷史建築又點情況呢？原來都唔好得去邊，好似三級歷史建築士宏書室咁，已經淪為雜物房，擺滿卡式石油氣爐、摺枱、膠櫈，大家不難想像，呢間儒雅書房盆菜宴後杯盤狼藉嘅樣子。古蹟變危樓，歷史建築變雜物房，由此可見，唔係香港無文化遺產，只係官員唔識寶啫。
所謂愈窮愈見鬼，香港向來被視為文化沙漠，由小漁村演變成大都市不過匆匆百年，所以古色古香嘅歷史古蹟更加寶貴。可悲嘅係，官老爺唔係當寶，而係當草，古蹟空置唔去保育，毀壞又唔去修葺。私人古蹟如何東花園已經存留唔到，如果連政府古蹟都逐漸消失，香港仲有乜嘢歷史遺產留畀子子孫孫？唔通真係只留低一份集體記憶？
講開又講，港府糟蹋古蹟已經唔係新聞。三年前又係一場黑雨，擁有幾百年歷史嘅大埔碗窰被沖落山腳底，搞到滿目瘡痍，令人不忍卒睹，你話港產官僚係咪抵鬧吖！
咁講啦，保育政策一塌糊塗，古蹟岌岌可危，港府更加淪為一座危樓，日久失修，搖搖欲墜，裏面嘅人徒有空殼而無靈魂，施政望天打卦，遲早冧檔o架咋！
楊侯宮損毀無人理，搞到磚剝瓦墮，令路人隨時天降橫禍。鬼唔望第一個「中頭獎」嘅就係保育官僚，等佢哋瞌眼瞓吖嗱，叮！
