香港特區立立亂，亂之源頭，乃係「係人都講兩嘴」，呢啲何謂「係人」，並非掃把頭所指的茶餐廳侍應或的士佬，而係香港廢柴政府裏的高層人士，個個身份特殊，句句言詞鏗鏘，可惜，唔知邊句堅邊句流，兼且，佢哋講嘢的可信性，早已負分到痹，本來不足認真對待的，但係，呢棚庸廢能人卻膠噏不斷，噪音擾民不特止，還搞壞港人心情，咁又怎叫香港人安居樂業？又怎叫香港唔亂吖？

政改問題，香港全城哄動，火熱得學者拚死以身試法、中產誓要佔中逼宮、學生提請重奪政府，連保皇黨也開聲督促政府盡早處理。此時，有位仁兄說佢唔會以行會成員身份回答「政改」問題，因政改尚未啟動；與此同時，特首卻話政府已就政改問題作出相關考量，依家離選舉期仲有好長時間，早一年、遲一年也不成問題，叫港人唔使咁心急，但全港七百萬人都知「政改方案」的實施，須有五部曲，還得跟全港市民「研究研究」、「商量商量」，而不是獨裁專權式由皇帝頒令執行，現離二○一六、一七年，時間無多矣！若信佢所言，至今，政府內部仲未傾過，咁就好弊！若信特首所說，佢哋已計過晒數，大把時間有剩，叫我哋放心，那即是說張生話無討論過的，是講大話囉！

今時今日，香港市民都唔知要信邊個好！例如「佔領中環」的發言人說「打不還手，拉不還口」，全部「佔中者」願意配合警方，但禿鷹處長卻聲言會出動整支警隊二萬八千幾去應對！大佬，人哋只吹雞一萬啫！你哋使唔使無信心成咁，要三比一的「勞師動眾」呀？乜唔係「和談」比「動武」的好嗎？是否決定唔傾呢？好亂呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps