Sun奇古怪：Sun潮語：【本土】
廿幾年嚟，每到春夏之交，歷史嘅傷口總會隱隱作痛，驚醒嗰晚火與血嘅噩夢。光陰荏苒，八九六四至今已經廿四周年。每年都有數以萬計嘅香港人都會去維園，參加燭光晚會悼念六四死難者，呢個已經成為咗香港人嘅集體意識，而香港亦係中國領土唯一可以公開悼念呢場官方稱之為反革命暴亂嘅地方。點知去到2013年，支聯會竟然喺中港矛盾咁激烈，市面充斥愛國愛港力打手嘅環境，政治低能地祭出「愛國愛民，香港精神」嘅口號，搞到一班「本土」派呼籲杯葛六四燭光晚會，仲逼到支聯會改口號。呢班所謂「本土」人士，係乜頭乜路？
「本土」並唔係近年先有嘅觀念，係自從反蝗蟲反雙非反水貨等行動後，「本土」先潮起上嚟。「本土」係指香港本地，「本土論述」就係主張特區政府政策應以香港「本土」優先，因為基本法保障香港係一國兩制、高度自治及港人治港，香港嘅政治及政策應由港人自決，並非由中央操控。
「本土」分為好多派別，有鼓吹中港區隔以陳雲為首嘅「城邦本土派」、有認為香港係一個民族、只維護土生土長港人利益，拒認港人乃中國人身份嘅「土著本土派」、有啲係不太反中國，但爭取政策應以港人優先，以立法會議員范國威及毛孟靜等人為首嘅「溫和本土派」。有部分「本土」派近年遊行時高舉殖民地龍獅旗，阿爺就將佢地打成要搞「港獨」。其實，一國兩制本身係夾硬將兩種對立嘅價值擺埋一齊，再者政府只懂向中央卑躬屈膝，完全無以港人利益為重，市民嘅火自然會燒向鄰近地區，呢啲都係「本土」抬頭嘅因素。「本土」係本地人為自己爭取權益，天經地義，連自己地方都未搞掂，嗰啲國家嘅事……關我咩事？
