政壇：搞搞政：高永文最叻冧靚太
設計圖片及對白
新政府嘅問責官員中，食物及衞生局局長高永文民望不俗，加上佢最識冧人，出席公開場合受到嘅待遇都好啲。尋日周末，高永文由朝早開始就四圍撲，出席幾場活動做主禮嘉賓。出席婦協健康月開幕禮時，好多靚太一見到佢都笑面如花，高永文致詞時亦大擦在座太太們嘅鞋，佢話健康應由家庭出發，而男士們嘅健康，全靠太太平日喺家中做好「衞生政策」，仲話包括佢太太喎！
設計圖片及對白
高永文既氹人哋嘅太太，又不忘冧自己太座，佢仲話好羨慕香港有咁多婦女組織，為女性提供支援服務，唔知幾時至會有類似嘅男性組織喎。咁樣笠高帽，在場女性梗係心花怒放，打招呼、握手，仲有現場女士喝采添！有參加者就話，高局長民望高，人又夠親和，沙士嘅時候仲瞓身抗疫添，現場真係高帽滿天飛。
早前我哋先話過高永文唔怕熱，三十幾度巡街市仲着風褸，尋日又係熱到爆錶，高局長四圍走都孭住厚重嘅西裝，咁樣會唔會有害健康o架？
