政壇：陳正欣保育圍村客家話

本土文化係一個地區嘅根，年前獲政府委任為衞奕信勳爵文物信託受託人委員會及基金委員會成員嘅保良局總理陳正欣（Daniel），好關注本土文化。日前佢同太太陳慕婷出席一個場合時透露，新界有唔少圍村村民講客家話，但原來每條村嘅客家話都有少許差異，隨住老一輩相繼離世，呢啲獨特嘅語言面臨失傳，佢哋委員會經審批後，決定撥款畀志願民間組織，將有關文化製成文獻作為參考紀錄。Daniel仲話，加入委員會後了解咗好多書本上冇記載嘅香港歷史。