政壇：羅詠詩加入樂善堂大家庭
九龍樂善堂早前舉行新一屆總理就職典禮，新主席韓世灝（Johnny）喺前主席鄺祖盛手中接下火棒，仲搵埋香港青聯賢慧社主席羅詠詩（Anthea）加入樂善堂大家庭，極少公開露面嘅Anthea老公黎藉冠（Michael）特登現身撐場。Anthea話，七月即將卸任賢慧社主席，到時就有多啲時間投入樂善堂工作喇！
「玻璃大王」李賢義長子李聖潑（Put）亦有到場，佢係樂善堂常務總理。斯文低調嘅阿Put話，現時主要負責集團嘅地產及科技業務，經常中港兩地走，不過幾忙都要抽身做善事，加入樂善堂至今已八年。阿Put嘅弟弟、即「中國舒拉寶娃」晏紫老公李聖根就係東華總理，兩兄弟行善熱誠十足。樂善堂去年首次同前半島酒店糕餅總廚黎嘉明合作，推出慈善迷你奶皇月餅籌款，今年決定捲土重來，預訂價每盒八件售二百三十八元，比去年平咗兩成。Anthea好雀躍話，到時會掏荷包買嚟送贈親朋好友。
