政壇：牙擦魔童死撐冇壓力
設計圖片及對白
香港電視（HKTV）主席「魔童」王維基，向政府申請增發電視牌照三年幾都未有聲氣，眼見「一哥」無綫電視成功爭取巴西世界盃獨家播映權，魔童前日就親自出馬，影相求網民喺HKTV嘅社交網站專頁「讚好」（Like），目標藉五十萬個「讚好」發動另類網上民意攻勢。但魔童呢頭積極部署做「電視大亨」，嗰頭又口硬，出席個活動時自言最鍾意前路茫茫嘅感覺，以此強調自己好韌力，佢仲豪氣咁話，自己個電視台閒閒哋有二十億資金「壓袋」。咁講，即係話佢有排未乾塘，路再長亦冇壓力喇?
設計圖片及對白
魔童尋日出席活動，向年輕人分享自己嘅創業經驗，甫出場就急不及待問現場觀眾有冇「讚好」HKTV，成班後生仔隨即好似「教徒」咁力撐魔童。魔童提起政府遲遲未發免費電視牌照，都忍唔住「單打」，如揶揄自己等咗三年零五個月都未開台，「心路歷練真係未必個個有我咁好韌力」，又話除非打政府工，否則成功嘅生意人係絕對冇「平衡生活」呢回事，明寸暗踩政府真係句句有骨。
唔信2015先發牌
對於近排免費電視牌照風聲四起，有傳行政會議即將開會商議，亦有傳「三個只能活兩個」，申請條件最差嗰間隨時被踢出局，相信普通市民都等到個心「囉囉攣」。不過，魔童作為當事人就自爆從來冇壓力，皆因佢好鍾意前路茫茫嘅感覺，仲以年輕人好鍾意玩嘅手機遊戲程式Candy Crush為例，自言當遇到嘅難題好似Candy Crush過唔到關咁小兒科，絕對唔會因為呢啲濕碎嘢而有壓力，真係牙擦過牙擦蘇。
魔童唔知係咪嫌得罪政府唔夠，尋日除咗聲稱HKTV閒閒哋有二十億元淨現金「壓袋」，係三間申請牌照嘅電視台中資金最充裕嘅之外，又話唔信政府會等到二○一五年先發牌喎。
