政壇：政商定格：沈祖堯甘肅建橋怕如廁
沈祖堯（右二）自言不及黃錦星（右一）咁適應原始生活。
喺今個月初，中文大學校長沈祖堯同班大學生一齊幫村民建橋。佢大呻無廁所好唔慣，搞到要飲少啲、食少啲，唔想去咁多次廁所。佢話咁大個人，頭一次去咁原始嘅農村，覺得無廁所好得人驚，「就咁掘個窿，大大小小都喺晒度，由於靠自然分解，所以隔幾日都仲見到。」「辦公」時仲要有一班雞鴨「觀眾」兼一齊排泄，浸味就更難頂，又惹埋好多烏蠅同蚊埋嚟，好唔衞生。
沈祖堯（右二）自言不及黃錦星（右一）咁適應原始生活。
農村好多時都係將啲垃圾掉落河，再沖落下游分解。沈祖堯去起橋幾日，三餐都係村民供應，一齊食大鑊飯。點知村民煮大鑊麵，會拎去條河「過冷河」，「垃圾掉去下游，上游垃圾都會流落來，咁都係會中招。」好在食完又無咩事啫。佢話可能同佢係醫生嘅職業有關，唔係幾接受到，同行嘅環境局局長黃錦星就好似無咩嘢，所以都好佩服局長。
