政壇：搞搞政：行會前AO人士 議政問得仔細

林奮強喺行會裏面最大特點，好多有份開行會嘅人都話，就係口水多過茶，事關身為智庫組織「香港黃金五十」創辦人嘅佢開會最鍾意講學理兼拋數據，可惜當中民情考慮欠奉，政治考慮不足，長篇大論終被視為吹水言論。

其實，好多人都唔明白只係論政唔會令個政府運作。林煥光、葉劉淑儀同羅范椒芬喺呢啲時候就可以顯出功架，點解？因為佢哋以前都做過政務官（AO），佢哋以前喺行會甚至港英年代嘅行政局點畀人問到口都啞，佢哋今時今日，都以同一態度，去「審問」出席嘅政府官員。

聽聞佢哋一拎起份文件就問不停口，打爛沙盆問到篤，籠統如政策成效，細緻至落實具體時間表，分幾多個階段推行，三人組都要問一大輪。當然啦，佢哋以前係寫文件嘅人，今日佢哋負責睇文件，就金睛火眼，一睇就知問題隱藏晒喺邊，全部無所遁形。