政壇：莊學海嫁女李嘉誠到賀
李嘉誠（右六）親自到賀新郎蘇展鵬（右五）同新娘莊錦兒（左六）新婚之喜。右起為莊學海兩名千金、莊太及莊學海，左四同五為男家父母蘇志剛夫婦。
中南鐘錶創辦人莊靜庵嘅次子Bob莊學海家有喜事，佢嘅長女Karen莊錦兒下嫁廣州長隆集團董事長蘇志剛嘅長子蘇展鵬，到賀嘅政商界名人冠蓋雲集，仲有Bob嘅姊夫長江集團主席李嘉誠等親戚。
李嘉誠（右六）親自到賀新郎蘇展鵬（右五）同新娘莊錦兒（左六）新婚之喜。右起為莊學海兩名千金、莊太及莊學海，左四同五為男家父母蘇志剛夫婦。
阿Bob哥哥莊學山同弟弟莊學熹亦落場迎賓。原來Karen係莊靜庵家族第三代後人之中，第一個成家立室，見到莊家開枝散葉，難怪幾兄弟當正自己辦喜事，個個笑到見牙唔見眼。
問起大埔洞梓慈山寺觀音像嘅進展，莊學山話工程接近尾聲，跟住要度橋搞好導賞及接待善信嘅安排，事關寺院係淨化心靈之地，唔想變成旅遊景點。篤信佛教嘅香港大學專業進修學院院長李焯芬亦係慈山寺嘅董事局成員，佢形容寺院係一座好優雅嘅唐式建築，寶殿牆身仲嵌有來自敦煌嘅珍貴壁畫，希望今年底可以對外開放。
