政壇：鄧竟成借尿遁避談貪湯
鄧竟成
前廉政專員湯顯明被踢爆「自己批開支畀自己使」，令廉署酬酢、送禮等開支連年上升，仲畀立法會揭發佢連豪食四百蚊早餐都由公帑找數，但貪湯堅拒辭去中央委任嘅全國政協職務，令人質疑政協已淪為藏污納垢嘅溫床。年初同貪湯齊被委任做政協嘅警務處前處長鄧竟成（圖），尋日聽見記者問湯顯明貪腐事件時，都即時借尿遁，避得就避。
鄧竟成
以往鄧竟成對傳媒都算係有問有答，但對於舊同僚佗衰家可以點答呢？佢咪只能夠匿埋喺廁所囉。可惜會展中心嘅廁所無後門，佢喺廁所唔夠五分鐘就出番嚟，最後嘅決定都係對貪湯不作任何評論，仲加多句「呢啲嘢唔方便代湯生回答」，叫我哋問番湯顯明本人，之後佢就走入貴賓室。
喺三月初北京兩會期間，當時未揭發貪湯醜行，鄧竟成同貪湯仲係形影不離，次次都係一同見記者，家陣佢連開腔撐幾句都唔敢，唔止同貪湯劃清界線，仲證明咗貪湯今鋪「斷正」，幾老友都無面畀囉。
