政壇：CY做早操雙手叉腰
陳茂波（前右一）表演壓腿功架，梁振英（前左一）睇嚟需要再鍛煉多啲。
特首CY梁振英尋日晨早拉埋發展局局長「波波」陳茂波去咗啟德，同班地盤工友做早操並進行地盤零意外誓師。
陳茂波（前右一）表演壓腿功架，梁振英（前左一）睇嚟需要再鍛煉多啲。
CY嘅頭號得力助手張震遠請辭唔做行會，傳媒當然想聽吓佢嘅睇法，但唔知係咪做運動做耐咗，佢喺活動後極速閃人，無按原定計劃同現場工友傾兩句。
活動主題係誓師儀式，但最有睇頭嘅梗係台上官員拉筋壓腿顯功架。最近盛傳腰痛嘅CY全程雙手叉腰，姿勢僵硬。
工業傷亡權益會斥做騷
工業傷亡權益會黃昏發聲明，話對呢場政治騷表示反感。該會批評近日接連發生多宗嚴重工業意外，政府只做呢啲表面工夫粉飾太平，而唔去改善問題。
