政壇：長毛吸力嚇窒白鴿
設計圖片
觀塘區議會坪石選區補選結果塵埃落定，社民連「長毛」梁國雄雖然一如所料，輸畀被諷刺靠父蔭贏出嘅「橄欖仔」陳俊傑，但由佢走激進路線兼「零落區」嘅劣勢下，依然從被視為建制派票倉嘅坪石選區吸到三分之一選票，可見激進民主派喺傳統「老區」唔係冇市場，相信死守溫和派嘅白鴿黨睇見長毛今鋪高票落敗都咪話唔嚇一跳，亦為白鴿黨未來嘅選情響起警號。
設計圖片
設計圖片及對白
長毛「空降」參選，仲只係臨時臨急搞造勢大會亦只係得人民力量等長期戰友撐場，白鴿黨稍為有分量嘅老鴿全程影都冇，加上當時正值立法會「拉布」爭議風頭火勢，長毛呢個時候挑機理應輸到渣都冇。
坪石邨長年由建仔「世襲」，白鴿黨早年曾派出林森成對撼橄欖，但都屢戰屢敗而宣布棄守坪石，因此坪石邨十幾年來，先係由建仔「橄欖」陳鑑林出任區議員，直至○七年由黨友陳百里接棒，其後橄欖仔再成功「隔代」接任，所以話呢個建制派地盤基本上插針唔入，長毛搶逾千票可謂異數。
民主黨老化 粉絲過檔
其實白鴿黨曾考慮派出前黃大仙區議員徐百弟「隔代」挑戰橄欖仔，想話借分屬老友嘅林森成成功搶攤，可惜最終因「怕輸」而放棄。怕輸唔係冇原因，皆因佢哋早排喺沙田區會田心同鞍泰選區，心口掛勇字派人上場，最終兩次都因泛民協調失敗，派出超過一人參選而令建仔得利。
白鴿黨近年出戰立法會選舉已輸吓又一個、輸吓又多個，加上過去多次參選都被人民力量狙擊，莫講話要喺區議會搶灘，就連力保議席都成問題。黨內近年人口急速老化，若果呢班老鴿再死守過去嘅光輝而唔再重新部署，真係難怪粉絲過檔。
