名校紛紛轉直資 貧童只能望門嘆

對基層家庭嚟講，所謂知識改變命運，簡直係一種諷刺。今時今日，學校分等級，學生分貴賤，通往知識嘅道路，富家子弟路路暢通，貧困學童處處受阻，未起跑已定勝負，靠知識脫貧，改變命運喎，講就易咯！

呢嗱，又有名校對基層學童閂定大門嘞。逾百年歷史嘅中西區傳統名校聖士提反女子中學及附屬小學，計劃二○一五年轉為直資學校，學費水漲船高，每年三萬六到四萬二，畀唔起？對唔住，閣下自理。唔怪得有家長直斥學校飛擒大咬，連中產家庭都讀唔起；有家長喺社交網站設關注組，反對該校轉為直資，唔排除發起進一步抗爭行動添。

其實，近年傳統名校紛紛轉為直資學校，早就唔係乜嘢新聞嘅喇，呢啲所謂直資學校，一邊接受公帑資助，一邊收取昂貴學費，加上「世襲」制度不斷侵蝕學位，變相將清貧子弟拒諸門外，簡直就係製造教育不公。香港跨代貧窮不斷惡化，咪就係教育不公引起嘅囉。

講真，名校生源無憂，大把生存空間，轉直資根本就係諗縮數，公帑袋袋平安之餘，使錢又無王管，可以隨心所欲，乜都自己話晒事，呢條數梗計得過喇。唔怪得涉及直資學校嘅醜聞愈來愈多，就算財政混亂，黑箱作業，政府一樣吹佢哋唔脹。連前任教育局高官都承認，政府對直資學校完全「無牙力」。咁搞法分明攞納稅人嘅血汗錢較飛啫，叮！

喺荒謬嘅教育政策之下，富家子弟大把機會，世襲官津名校又得，選擇私校、直資或國際學校亦得，條條大路通羅馬。而基層學童就愈窮愈見鬼，難以負擔高昂學費，入讀名校嘅機會被剝奪，從一開始就輸喺起跑線上，無辦法透過接受良好教育脫貧，人生道路愈走愈窄，有乜法子唔怨氣沖天吖。講到底，本港貧富懸殊，兩極分化，主要原因就係教育不公，港府助紂為虐，嫌貧愛富，實在難辭其咎。

呢，早前教育學院有項調查顯示，雖然本港大學學位不斷增加，但主要受惠嘅係富裕家庭子女。孔子提倡「有教無類」，無論貧富貴賤都可以獲得接受教育嘅平等機會。可惜今時今日，直資學校貴族化，基層子女望門興嘆，有教無類已經淪為一句空談，叮！