香港電影金像獎頒獎禮：陳靜爆冷奪女配 鄭中基攞男配眼泛淚光

繼金馬獎後，鄭中基（Ronald）憑《低俗喜劇》的「暴龍哥」再下一城，與陳靜（DaDa）分別奪得「最佳男、女配角」，Ronald更由頒獎嘉賓之一的舊愛楊千嬅手中接過獎項，不過二人只肯保持遠距離地「世紀握手」，千嬅頒完獎後即時退後，不肯與Ronald抱抱，二人均表現尷尬。Ronald致謝辭時眼濕濕表示很緊張：「我由出道開始已經畀人印象唔好，因為我爸爸係唱片公司老闆，我亦都以為自己唱咗幾首歌好叻，而我都冇令大家跌眼鏡，周不時都出事，好彩遇到好多貴人，今次得獎證明影圈開始接受我，我唔會講我會繼續努力，因為講冇用，我會做出嚟畀大家睇，我亦都要多謝太太同個女。」此時在台下的太太余思敏拿出紙巾頻頻抹眼淚。

而DaDa亦憑《低俗喜劇》爆冷奪得「女配角」，她聽到自己得獎即激動掩嘴，更攬攬身旁同是提名女配的邵音音及導演彭浩翔，她在台上激動欲哭地多謝導演彭浩翔和杜汶澤：「冇諗過攞獎，我同香港人一樣都努力搵到自己嘅方向，我會繼續努力。」另外，其舊愛王宗堯在微博恭喜她得獎，亦有網民鬧爆DaDa不是實至名歸，並笑她應該要多謝「爆炸糖」，而女配大熱的金燕玲則在台下黑面。