香港電影金像獎頒獎禮：家輝稱帝千嬅封后

「香港金像獎」昨晚揭盅，39歲的楊千嬅以大熱姿態擊敗獲兩項提名的周迅，初嘗金像影后滋味，更興奮得「發台瘟」，於台上大叫7次「死」字，而梁家輝亦擊敗三大影帝，第四度稱帝。《寒戰》則成為全晚大贏家，平了金像獎紀錄，共奪9個大獎。

昨晚假香港文化中心舉行的《第32屆香港電影金像獎》頒獎典禮，一如本報所料，呼聲較高的楊千嬅開齋封后，揮低影后周迅及首次入圍的江若琳。初嘗影后滋味，難怪奪獎一刻激動得淚流滿面；而現年55歲的梁家輝繼2006年後，再憑電影《寒戰》擊敗三大影帝梁朝偉、張家輝和劉青雲，第四度稱帝。

在樂壇奪獎無數的千嬅在影壇亦已多年，但成績卻有所不及，雖然過往曾角逐金像影后，但次次皆失望而回，今年她大熱出擊，結果不負眾望成功摘后。全晚勁風騷的她，宣布奪獎一刻時甚為愕然，又笑又喊，其後與身旁老公丁子高肉緊擁抱，丁子高更錫了她面一啖。其後她上台自張學友手中拿下影后獎座，更開心得一片空白，連叫7次「死」字，她喊着說︰「好驚！點解咁驚！」其後再忍不住喊，再說︰「好多謝學友，投票評審，多謝你哋，冇諗過有呢個機會，多謝彭浩翔，部戲角色係導演揀，有聽聞過我係執二攤。」

笑淚交融的千嬅再感激大家的支持，她說︰「自己歌手出身，好多嘢都唔識，好多嘢年少無知，感謝畀機會我嘅人！」此時林家棟即插嘴叫她的舊愛鄭中基講兩句，千嬅聞言後即說︰「你唔好咁先！」及後再說︰「我大肚唔能夠參加宣傳，多謝你哋幫忙，多謝畀機會我嘅人，我有信心繼續努力。」而最後她卻漏了感謝老公丁子高。

咀老婆江嘉年

相反曾三奪影帝的梁家輝今年再稱帝，心情卻相當平靜，他奪獎後即咀老婆江嘉年，於台上從黃秋生及葉德嫻手中拿過獎座後，他笑言不會哭︰「多謝家人、妹妹，仲有兩個女，啱啱個女打畀我，叫我一定要多謝佢，我問點解，佢話睇咗4次套電影，我話咁都係幫補票房，叫老闆多謝你，個女就講每次都帶20位同學用我嘅錢買飛睇，睇嚟要努力拍戲幫補吓。」接着他感激《寒戰》團隊，並做了敬禮手勢向各人致敬，及後不忘於台上晒恩愛，他說︰「仲有一個屋企人，夜啲會用自己嘅方法感謝佢，呢度唔講得出街。」家輝最後都忍不住眼濕濕。

而最佳電影由《寒戰》奪得，最佳導演則由首次提名的梁樂民和陸劍青憑電影《寒戰》大熱奪得，二人更連下兩城，奪最佳編劇獎項，令《寒戰》成為今屆大贏家，共奪得9個獎項，平了第16屆電影《甜蜜蜜》的紀錄。

梁家輝

年齡：55歲　

入行年數：逾30年

曾獲電影獎項：之前已奪三屆金像獎影帝：《垂簾聽政》（1984年）、《92黑玫瑰對黑玫瑰》（1993年）及《黑社會》（2006年），及曾獲金馬獎影帝：《愛在他鄉的季節》（1990年）。

楊千嬅

年齡：39歲　

入行年數：18年

曾獲電影獎項：憑《抱抱俏佳人》獲「第18屆香港電影評論學會大獎」「最佳女演員」。