SUN奇古怪：【離 地】lei4 dei6

近排揭開報章雜誌，或喺網上都唔難發現「離地」呢個潮語。「離地」通常係用作形容詞，形容某啲人嘅想法甚至行為，脫離普羅大眾，不食民間煙火，不知民間疾苦，有時更不知今夕何夕，總之係雙腳離地，即係活於天際，高高在上。

關於2017政改方案同佔領中環，經過一輪密集式討論，真係開始有啲悶。以陰謀論去睇，莫非呢啲都係上大人出嘅招數？因為政改連諮詢都未開波，佔中又話要等到2014，咁長時間，等你班友傾到悶晒，乜point乜mood都冇，團火攤到凍晒嘅時候，你知香港人有幾三分鐘熱度啦？到時再講佔領中環，就已經變成啲過時嘢，無晒市場，再加上由一班「離地」義勇耆英G.I. OLD帶領，到時反應係點？真係不得而知。

不過近期最搞笑嘅都係人稱香港「民主之父」，查實係「民主伯父」嘅馬丁．李，竟然無厘頭拋出一個連譚耀宗都話好嘅方案出嚟，但隨即又「彈弓口」話要收番言論，真係唔知好嬲定好笑，唔怪得之靠佢爭取民主幾十年，都仲係「民」所未聞，原地踏步啦。有本土學者話佢哋呢班建制民主派係「離地」真係無錯。

就如一啲月薪三十幾萬嘅所謂局長，都話自己係中產，連一碟粟米石斑飯都唔知幾錢嘅人，就絕對「離地」。有班中產政客，個個大律師，完全唔知人間何世，諗埋啲嘢都係意識形態居多，曲高和寡，唔好話牛頭角順嫂，分分鐘連中環白領都唔知佢哋講乜，嗰啲咪「離地中產」囉！

「離地」嘅相反，應該係「陀地」。「陀地」無論從語言、行為、飲食、生活習慣都絕對地道，仲會細分到以區、以街為單位，雖然有時粗口橫飛、行為市井，但起碼「陀地」熟知一個地方嘅一切，同大眾同生活同呼吸，比起「離地」，感覺親切踏實得多。如果由「陀地」帶領佔領中環，我諗參與人數應該更多，效果將會更震撼！