政壇：搞搞政：橄欖謀拓政界地盤

最近賣舖勁賺八千幾萬元嘅立法會議員陳鑑林（橄欖），上月中喺勞工處刊登廣告聘請議員助理，月薪介乎一萬二千至一萬五千元，仲寫到明有雙糧，出手認真闊綽。據知橄欖本身有三個助理，呢段時間並冇聽聞有人離開，點解橄欖突然增聘人手呢﹖

政界中人估計，橄欖此舉或同佢愛子陳俊傑日前報名參選觀塘坪石選區補選有關，呢個時刻請到新助理，既多個生力軍幫手為愛子助選，有人甚至講笑話，如果呢位新助理啱嘴形嘅話，分分鐘到時可以服務晒橄欖兩父子。

仲有心水清嘅人一邊睇廣告一邊分析，呢份廣告話明申請人要有政治學教育背景，其中一個職責更係專門做政策研究同政情分析工作，其實喺依家呢個變幻莫測嘅政治生態，少啲洞察力同政治閱歷都做唔好呢項工作，橄欖突然對呢方面工作咁上心，足見佢已有喺政界擴展地盤、增強政治部署嘅大計喇。