政壇：金刀梁叫港大入贅中大

香港大學同中文大學係本地高等教育嘅兩大殿堂，尋日佢哋攜手舉辦研討會，討論本港大學應該點樣培育新世代人才。中大校長沈祖堯分享時話，全球步向一體化，大學除咗要向學生傳授知識外，仲要幫助佢哋塑造做人處世態度，令佢哋敢於同來自世界各地嘅學生競爭。沈校長又呼籲本港學生，眼望全世界，唔好單係將目標局限喺搵工同儲錢買樓之上。

港大校務委員會主席梁智鴻（金刀梁）同中大校董會主席鄭海泉老友鬼鬼，每次見面都例牌講笑，叫對方take over（接管）港大，鄭主席會回敬一句：「不如你都take over中大啦！」金刀梁之後就好感慨話，將來唔知會唔會有一日，兩間大學可以合二為一，咁大家就可以做少好多嘢喇。金刀梁竟然夠膽講笑叫港大入贅中大，唔知研討會後有冇港大人向佢詐型呢？