政壇：蘇錦樑急飛澳洲抱孫女

商務及經濟發展局局長蘇錦樑（Greg蘇）去年喜事重重，娶完新抱又嫁女，最近佢喺澳洲做醫生嘅囝囝同新抱更添咗個女，英文名叫做Caitlin，Greg蘇升級做爺爺，梗係急不及待飛去澳洲抱吓孫女啦，佢前日仲喺社交網站上載咗一幅抱孫相片，一副有孫萬事足嘅樣。

Greg蘇嘅新抱係澳洲人，去年三月先嫁入蘇家，一年後就生咗個中、澳混血兒孫女，英文名Caitlin意指「純潔」，出世時重八點八磅，絕對可以話係重量級女嬰。Greg蘇見到孫女肥肥白白，當然好開心啦，仲急不及待喺社交網站貼相，之後有近二百個好友恭賀佢，睇嚟稍後預算案喺立法會二讀同三讀，Greg蘇都會笑笑口對住啲議員喇。