專員外訪大花筒 廉署形象一朝喪

古人話，近朱者赤，近墨者黑，真係冇講錯o架。前特首曾蔭權爵士貪腐醜聞一籮籮，大小便宜唔放過，而被喻為佢「愛將」嘅前廉政專員湯顯明近貪者腐，原來都係一擔擔嘅咋。

日前本報踢爆湯顯明任內經常帶隊周遊列國，五年任期外訪三十四次，耗用公帑近四百萬元，被封為「外訪專員」。點知醜聞愈揭愈多，佢除咗有呢鋪「遊埠癮」，仲有一鋪「送禮癮」添，五年任期花咗二十二萬元公帑送禮畀各地政府官員，多達一百三十六次，淨係一○至一一年就送禮四十二次，每次少則九十元，多則過萬元。而最令人莫名其妙嘅係，現任副廉政專員黃世照自爆廉政公署內部對於送禮無明文規定，係咪外訪亦只由湯顯明自行決定喎。

咁都得？貪曾就話無王管，防賄條例規管唔到佢啫，家陣連廉署都係自把自為，想做就去做，咁仲成世界嘅？公務員仲有無規章制度o架？退一步講吖，就算廉政專員官式外訪需要送禮留念，都應該一視同仁o架，點解有咁大差別，有人送九十元，有人送超過一萬元，究竟有乜嘢準則呢？咁大份禮究竟送畀邊個呢？唔怪得有人懷疑，湯顯明全國政協委員嘅職位唔知係咪靠送禮得到。

正如有立法會議員話齋，廉署嚴格規管公務員，可以食飯唔可以拎，但廉政專員其身不正，自己周遊列國大花筒，咁又點可以令對方接收到香港嘅廉政訊息呢？其實計太一叮話齋，湯顯明頻頻外訪，根本唔係為咗交流廉政訊息，而係假公濟私，破壞香港廉政形象就真。

正所謂，紀綱一廢，何事不生。貪曾周遊列國，淪為離岸特首，其他官員有樣學樣，爭相外訪，搞到個個洗腳唔抹腳，連法定機構都唔執輸，尤其係平機會及私隱專員公署，曾被審計報告炮轟假公濟私，濫用公帑添。呢，貪曾一落台咋，港府外訪開支即時大減，證明上樑不正下樑歪，佢先至係浪費公帑嘅罪魁禍首。

講開又講，貪曾嘅貪腐醜聞已被揭發一年有多，依家仲係逍遙法外，究竟廉署仲要查到幾時！嗱，貪曾嘅愛將湯顯明都離開咗廉署九個幾月，照計無阻力嘅喇，仲有乜顧慮呢？唔通官官相衞呢樣嘢始終戒唔甩？咪話太一叮唔提醒吖，香港廉潔指數持續下跌，核心價值所餘無幾，如果廉署再唔執正嚟做，遲早畀人拆招牌嘅咋，叮！