SUN搞作：打橫嚟講：斯文犬儒Vs隱性暴力

日前，由一群泛民立法會議員組成的「真普選聯盟」，在城大舉辦首場「真普選」研討會，點知，畀一班號稱自發來踩場的三十多件網民，叫囂搗亂，擾攘一通之後，這個研討會還沒任何研討，便急忙宣布因有人破壞，要腰斬收檔。

今天，香港之亂，是戰後近七十年來所無的，由上而下，亂到九彩。政府內部之腐爛，如生蟲蘋果般，由裏面爛到皮綻肉霉，臭氣四溢。民間百姓之怨氣，像壓力煲般谷住谷住，已到臨界點，等緊爆炸的一刻。政府與民間的矛盾，亦因政府官員昏庸無能，搞到日益加深。一切一切皆沒有融和的迹象，真唔知，打後點死！

全港，只要精神正常、神經沒有問題的本地人都在明確追求公平公正公開的「真正雙普選」，這是回歸前的《基本法》清晰地寫入「憲章」的，亦唔知點解，中國大陸啲高層諸番反口，無信誠，講咗又唔做，都唔知等乜？同驚乜？

成大班高級知識分子泛民搞活動，點知，居然畀那區區三幾十個低莊下三濫的嘍囉，三兩吓手勢就砌冧咗，你哋仲想做「偉大使命」的爭取公義行動？連如斯低質的暴民都頂不住時，如何面對他們背後那股更兇殘惡毒專制的黑勢力呢？還有呀！人家在你們開檔前，已事先張揚爆晒響口來踢館玩嘢o架啦！猶如嗰批阿爺信鴿，話明「普選」無你哋份個喎！你哋真係搞得掂？看今次表現，叫人擔心呢！

老友，隱性暴力行動，陸續有來呀！各位睇路！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府