SUN搞作：少膽虫手記：壹窮易帛

開例會嗰陣，淫賤黎呻吟：「唉，我登記到拾玖全霉之後，唔畀我再登記呀！」淫賤黎之前登記一堆公司諗住假外判，點知都唔夠用。少膽虫見又有位上，就獻計：「老細你可以試吓逆向思維，登記零全霉呀，零電視呀，唔夠仲可以負壹、負貳添！」淫賤黎大讚：「負貳全霉好！同正義傳媒打對台！」查實智能電話同板腦流行，美國嗰邊已經有五百萬家庭告別電視機，進入零電視時代。大家有眼睇，淫賤黎嘅壹電視，遲早都歸零。

講開打對台，呢排正義傳媒回饋讀者，氣勢如虹；反觀《爛果》同尋日頭條戴錯嘢夫人，一齊趴晒街。淫賤黎要救亡，就問少膽虫：「正義傳媒咁勁揪，咁我哋送啲乜抗衡？」少膽虫點敢提議。淫賤黎就話：「唔使怕，我哋無米，但係都識殯葬大亨！」少膽虫口快快：「殯葬大亨？送死定送殯？」

淫賤黎不悅：「教精你啦少膽虫，事實就係不實，不實就係事實。做新聞如是，講嘢如是。」少膽虫知衰，即刻補鑊：「係係係，我哋送壹蚊帛金券啦不如！」淫賤黎拍晒手掌：「有創意！估唔到少膽虫做成十年，都keep住求新呀！」少膽虫抹一額汗，但係好擔心今晚啲員工搶《爛果》，剪帛金券落嚟，塞爆淫賤黎間房咋。

少膽虫