政壇：葉建源赴上海無啖好食

H7N9禽流感喺華東爆發，上海亦係災區之一，立法會教育界議員葉建源就喺上星期同班小學老師一行十一人參加咗香港教育學院搞嘅上海交流團，同當地小學交流。佢話出發後先知當地「中招」，去到自然非常小心，雞又唔敢食、豬又唔敢食，高危嘅禽鳥更加掂都唔掂，連大家出門旅行好鍾意嘅「掃街」都唔敢去，謝絕街邊小食同生冷食物。

佢仲話因為擔心食物衞生，佢哋咁多日都係「上館子」，去啲望落企理嘅餐廳，同埋淨係食牛肉同蔬菜，最多都係叫啲煮熟咗嘅海鮮，最後平安歸來。但咁樣食足七日，難怪佢話食牛食到厭喇。