政壇：搞搞政：選舉論壇投訴多 譚志源馮驊齊救火

政府最近向立法會提交文件，披露舊年九月立會選舉期間，選管會收到二百三十七宗投訴，當中一百五十六宗唔滿意有節目或報道偏頗、不公平陳述同評論，另外七十六宗認為有關傳媒機構發言時間、報道或出鏡安排給予候選人不公平或不平等對待。另外值得留意嘅係，相比○八年立會選舉只有三宗投訴，舊年立會選舉就有三十八宗投訴涉及廣播機構舉辦嘅選舉論壇，急升近十倍，而其中三十二宗涉及選舉論壇對候選人不合適或不公平評論。嘩！班直選議員睇到呢堆數字肯定會爆火，負責選舉嘅政制及內地事務局局長譚志源同選管會主席馮驊認真要諗吓計救亡嘞！

針對相關問題，有人提出有兩方面可以諗吓，第一係研究係咪需要制訂指引，特別就節目製作同播放安排，包括主持形式、發言時間安排等作規限，第二係應否給予主辦機構更大自由度邀請部分或全部候選人參加其選舉論壇，尤其當候選人數目多嘅時候，相信可避免出現聲疊聲嘅混亂情況。

話時話，若主辦機構可選擇只邀請部分候選人，到時或會畀人話有篩選之嫌，加上選舉本身秉持公平及平等對待原則，傳媒本身亦有編輯自主同製作自由，點樣可以喺兩者間取得平衡，真係好考功夫。