政壇：李三元未寫論文先除蟲

東華三院前主席John李三元係超級歷史迷，早前佢重返大學讀歷史系碩士，估唔到愈讀愈有癮，近日仲報埋個博士班，連論文題目都交埋，就係研究廣華醫院歷史。

大家都誤會阿John喺廣華出世，但佢話廣華屬東華一部分，感情分都加唔少，加上廣華歷史橫跨一世紀，足以反映香港醫療發展史變遷。而佢開筆前要先睇晒大堆廣華文獻，部分已封晒塵，所以佢已聘請專人為文獻除蟲，再將文獻數碼化，咁就點揭都唔怕爛喇。

為保育東華珍貴歷史檔案，阿John捐出一百萬元支持東華嘅「歷史文化基金」，而東華就決定將該院文物館地下辦公室命名為「東風破紀念堂」，以答謝佢嘅支持。點解個堂唔用佢個名命名呢？佢笑言《東風破》係佢任內推動拍攝嘅東華一百四十周年紀念電影，更有代表性喎！