政壇：英政客來港密會六黨

每逢香港討論政改嘅敏感時刻，總有英國政客現身香江，近日英國前外相、工黨施仲宏（Jack Straw）就途經香港，尋日仲秘密約會本港六個政黨嘅核心成員食早餐，談論一七年政改方案問題。新民黨立法會議員葉劉淑儀尋日就喺社交網站爆料，話討論過程中有少少「激辯」，莫非施仲宏來港想介入普選？非也，原來係有人埋怨英國點解唔出手幫香港推普選。

有與會者透露，原來係白鴿黨主席劉慧卿埋怨英國人點解唔幫香港爭取普選，仲話現時嘅選舉委員會對泛民主派唔公平喎。雖然劉慧卿開到聲尋求前宗主國幫忙，但據講同場嘅英國駐港總領事吳若蘭回應話，呢啲係香港嘅問題，應由香港人自己爭取。而施仲宏回應選委會問題時就舉例話，正如美國民主黨去到德州要求共和黨支持者支持都有困難，寓意參選人得人喜歡或反感乃平常事，劉慧卿今次真係自己攞架嚟丟。

劉慧卿回應查詢時，話佢唔可以引述施仲宏嘅說話，但佢覺得依家話要為普選特首設條件好唔公平囉。