政壇：老將硬做公職王

政府連日來公布多個委員會嘅成員名單，前日就公布由第一代「公職王」Moses鄭慕智出任免費幼稚園教育委員會主席，尋日又公布由現任香港大學校委會主席「金刀梁」梁智鴻，出任標準工時委員會主席。相信大家都有同感，點解政府公職來來去去都係由呢班人擔任呢？兩位年紀都唔輕，但仍然畀多朝政府循環再用，唔通香港真係冇肯做公職嘅人才？鬧人才荒鬧得咁緊要？

曾被指違六六規定

Moses作風低調，通常見到佢都係喺啲慈善活動或聖誕節獻唱，事關佢係男高音，但其實佢人面極廣，早喺○九年獲委任為離職公務員就業諮詢委員會主席時，一度被質疑一人同時擔任七項公職，違反一般人只能同時擔任六份公職、任期唔可以連續超過六年的「六六規定」，雖然佢事後澄清，但當時卻掀起一場小風波。Moses曾經出任中學校董，加上又係教統會主席，今次主理幼稚園教育改革都不無道理。

至於年屆七十三歲嘅金刀梁，曾任行政會議成員、立法局議員同醫院管理局主席，之後又做過安老事務委員會主席，就連平機會主席嘅遴選委員會都係由佢擔任主席，最後翻閹有「每周一鑊」之稱嘅「廢官」食物及衞生局前局長周一嶽做平機會主席，惹嚟外界爭議，炮轟將平機會變成退休高官樂園。

雖則話金刀梁行政經驗豐富，公職勝任有餘，但今次由佢掌管同工人權益關係密切嘅標準工時委員會，就真係大纜都扯唔埋，亦正反映人才凋零現實。