公僕秘撈成風 皆因港府放縱

公務員「秘撈」搵真銀早已係公開嘅秘密，以前揭發嘅多數係單獨或者最多幾個人拍檔搵食，近排消防處竟然爆出涉及二十八人嘅集體秘撈醜聞，問你驚未。

話說警方前排調查一宗珠寶展失竊案，發現保安公司派駐現場嘅部分兼職保安係消防員，佢哋雖然冇涉及竊案，但就懷疑有人無申報而從事外間受薪工作，至少涉及同一保安公司負責嘅三次珠寶展及拍賣會，惹來廉署介入調查。而最令人震驚嘅係，有消防局中層懷疑做埋「兼職保安蛇頭」，安排下屬秘撈。事件引起消防處震動，史無前例怒炒五個未過試用期嘅消防員，至於其他涉及秘撈嘅人點樣處置，仲係未知之數。

話時話，消防人員違規秘撈醜聞屢見不鮮，早就見怪不怪嘅喇。就前排之嘛，有消防員被踢爆冇向上司申請兼職做婚紗攝影，秘撈期間仲涉嫌「撩」女模發生性關係添，衰多一鑊。

按規定，公務員喺辦公時間內或以外從事任何受薪嘅外間工作，或者喺辦公時間從事無薪嘅外間工作，都要事先申請，而且唔可以從事任何影響工作表現或可能同公職有利益衝突嘅外間工作。條文白紙黑字寫得清清楚楚，但好多公務員根本當條文冇到，簡直匪夷所思。

最奇怪嘅係，咁多消防員喺外面秘撈，而且唔係一日半日嘅事，處方居然懵然不知，可見消防處內部管理有幾混亂，甩漏有幾嚴重。其實正如有人話齋，消防處管理層唔係唔知有人秘撈，而係隻眼開隻眼閉，詐傻扮懵嘅咋。再咁落去，消防處睇怕要改名做「秘撈處」都得咯！

講開又講，其實消防員秘撈只係整個公務員隊伍嘅冰山一角咋。呢，有軍裝警員被匿名信舉報兼職做保險經紀，需接受紀律處分，仲搞出警署天台企跳鬧劇；有現役警員因為涉嫌由泰國偷運嬰屍陰牌，喺網上發售供人養鬼仔被拘捕；有社會福利署嘅工作主任被網友揭發經營網上玩具拍賣生意。最搞笑就係，前排有警員化身的士司機秘撈搵銀，仲出蠱惑呃乘客濫收車資，結果斷正喺放蛇同袍手上。

廉署舊年向公務員事務局建議紀律處分或接受行政調查嘅政府人員，激增超過六成，當中唔少就係涉及違規兼職。計太一叮話齋，公務員秘撈成風，完全係因為政府有法不依，執法內外有別，對市民嚴，對自己友寬。綱紀不振，秩序鬆弛，有乜法子唔七國咁亂吖，叮！