SUN搞作：少膽虫手記：血河

蜘蛛俠個叔叔臨死曾經講過「with great power,comes great responsibility」，呢句說話，淫黎近排都成日掛喺口邊。點解？當然唔止因為佢都就嚟死，最重要係對岸個淫竇賣唔出，佢諗緊計點填氹。

好似尋日我返到堆填區，深深索咗幾啖就諗住率領三軍投入創作，點知上到編輯部鬼影都無隻，反而廁所就賓墟咁多人。「肥豪，轆快啲！」「fing春蘇，你都嚟！」淫黎單淫賤交易難產，本來呢兩日都係年初三咁嘅樣，何解今日咁好中氣？我故意喺班女同事中間穿插一輪再頂開佢哋，終於畀我頂出真相。

肥豪同fing春蘇蘇，我一直都當佢哋係靈長動物，今日一見，方知造物主偉大。原來佢兩個喺淫黎指揮下變成兩條轆地小淫蟲，用赤裸嘅身軀幫廁所清潔。但見一肥一瘦嘅人間兇器喺同事睥睨眼光下左典右典，我先見識到何謂尊嚴嘅底線。

「虫！」一聲吆喝，就好似「你站在橋上看風景，看風景的人在樓上看你」，原來我已經畀淫黎盯上咗。「能力愈強，責任愈大！以後唔使買地拖，唔使買鮑魚刷，就由班編輯輪流轆廁所，轆完再編版！」吓？「咁原本班清潔阿姐呢？」淫黎無答呢個問題，只係拎番「流血不止」嘅正義報道出嚟，同我講：「虫，仲有幾個廁所末搞掂，你都準備吓啦。」正義報道上面「裁員」兩個字，同埋「年賺十三億」嘅癡人說夢，原來已經化成血河，向堆填區奔注……