SUN奇古怪：Sun潮語：【十 卜】

啱啱過完年無耐，復活節長假又開始，打工仔女又有機會休息叉電。可惜呢幾日天公不作美，日日陰天，間中有雨，仲要陰陰寒寒，想出戶外行吓都唔得，好多人都會選擇留喺屋企。但香港有班工人，偏偏有屋企唔返，公眾假期都要頂住惡劣天氣，喺貨櫃碼頭徹夜留宿，為嘅係希望爭取更好嘅待遇。今次好多唔同團體都出嚟「十卜」工人，偏偏就唔見平時口口聲聲為基層同工人嘅政團蹤影。點解？呢班友口講就「十卜」，實際係點？咪就係武術指導，曉講唔曉做囉！

潮語「十卜」，即係支持咁解。呢句潮語同好多其他潮語一樣，都係嚟自互聯網。「十卜」即係英文「Support」嘅廣東話譯音，喺鍵盤用倉頡輸入法打「十卜」，係比用英文打七個英文字母快好多，網民貪方便，就發明咗用「十卜」嚟代替「Support」。

有時為加強語氣，仲可以重疊地打多幾個「十卜」以表示非常支持，打三個「十卜十卜十卜」，加埋都係打六吓，比起「Support」七個字母仲要少一個，所以咁好用，當然好快就喺網上流行起嚟，成為潮語，仲會喺日常生活對話中出現。不過咬字方面就要小心，如果講得唔清楚，「十卜」就變成「實仆」，意思完全相反，咁就真係「仆」啦。

關於未來2017特首普選，諮詢都未開始，各界就已爭論不休，仲有中央官員開始出口術，內地官媒打鑼打鼓。另一邊廂，學者同政團密鑼緊鼓，要用愛與和平佔領中環，無論你「十卜」邊一邊，作為香港人，都希望你多啲發聲，表達意見。