政壇：搞搞政：吳克儉戴情侶錶「防癢」

唔少人感嘆維持一段感情唔容易，咁要維繫一段長達幾十年嘅婚姻又點呢？教育局局長吳克儉日前出席一個活動，就講笑披露絕招，原來當年佢同太太嘅婚姻踏入第七年時，佢恐防七年之癢發作，特別買咗對經典情侶腕錶，以靚錶綁住太太嘅心，依家二十幾年過去，佢手上仍然戴住呢隻防癢靚錶，似乎隻錶有用噃！

吳克儉喺官場有名你叫吳得掂，不過佢自創嘅箍實芳心大法就似乎掂咗。早前佢現身鐘錶業總會就職典禮，大家嘅話題好自然去咗講錶，吳得掂話，佢戴住嘅經典腕錶係佢同太太結婚七周年時買嘅，情侶錶梗係一人一隻，至今已經戴咗廿幾年，問佢點解係七年嘅時候買，佢笑笑口話，當年擔心太太有「七年之癢」，所以買嚟氹老婆囉！

出席同一活動嘅太子珠寶鐘錶主席鄧鉅明好熟悉中外名錶，佢話吳局長隻錶唔算好貴，屬中價錶，仲講笑話呢款錶啱晒「克儉」兩個字。