政壇：肥胡巡急症室揀錯時候

沙田威爾斯親王醫院急症室有大批醫護人員離職、導致人手嚴重不足，事件經本報獨家踢爆後，尋日下晝約五點幾，醫院管理局主席胡定旭（肥胡）竟趁周末兼長假期到威院急症室，只見佢喺多處望咗幾下就行番入醫院內部。不過，佢一見到我哋就急急腳行開。到底肥胡係唔係睇咗本報報道，專程到威院急症室突擊視察呢？據目擊過程嘅威院職員透露，肥胡除咗去到急症室周圍行吓，亦有同啲同事打招呼，期間同一名護士傾咗幾句，但唔清楚詳細對話內容，亦無聽聞有醫院高層出嚟接待佢。不過嗰位職員話，長假期頭一、兩日通常唔多人，加上尋日天氣唔好，輪急症室嘅人更少，質疑肥胡揀錯時間嚟視察。