政壇：詩姐發功前歎蛋糕咖啡

近排城中大講特首需要「愛國愛港」，基本法委員會副主任梁愛詩（詩姐）周四晚喺中環大會堂出席一個劇團酒會時，就直指特首必須「愛國愛港」乃係人都識嘅「common sense（常識）」，唔明點解咁顯淺嘅道理都引起爭議。詩姐一言擲地有聲，係咪度咗好耐呢？

原來呢晚（周四）佢出席活動前，下晝約五點鐘，詩姐已喺中環歷山大廈單拖出現，佢手挽雨遮同手袋，膊頭孭住個環保袋，行入一間連鎖咖啡店。買咗杯咖啡同個蛋糕，搵位坐低慢慢歎。不過，詩姐未坐定就收到個電話，傾完電話後見佢加快速度，唔夠十五分鐘就食完，然後往置地廣場方向離開，一通電話趕走咗佢嘅悠閒，當晚就見詩姐發功，你話兩者有冇關呢﹖