政壇：國安見證楊匡警車求婚

本港社運人士楊匡同親密戰友內地維權人士劉沙沙，前日喺內地被國安人員強行帶上警車，雖已先後獲釋，但原來當日喺警車上演咗一幕求婚記！楊匡同劉沙沙雖然只係識咗六個星期，但早前一齊去北京嘗試探望被軟禁嘅劉曉波太太劉霞，就此撻着愛火花，並於個多禮拜前喺網上公開情侶關係。

楊匡今次冒險返內地，其中一個目的正係帶沙沙「見家長」。當日被帶上警車後，楊匡好擔心沙沙嘅安危，於是生起求婚念頭，當佢細聲問沙沙可唔可以嫁畀佢，估唔到沙沙竟然大聲叫在場嘅國安人員幫佢哋見證，其中大部分國安都畀佢哋嘅大膽行為嚇呆咗，當中一位疑似較高級嘅國安就好大方咁恭喜佢哋。

楊匡同沙沙嘅喜訊傳出後，隨即有人喺網上自稱係楊匡嘅私生子，狠批佢冇盡父親責任。楊匡承認有過一段失敗嘅婚姻，但相信前妻同兩個仔都唔會咁樣攻擊佢，其他嘢就唔想回應喇。