政壇：勞聯發圍 冀月增千會員

自從立法會幾個勞工界議員走埋一齊、組成工黨之後，勞工界嘅勢力競爭就激化咗，建制嘅工聯會落力開拓政治版圖，依家連一向相對低調嘅港九勞工社團聯會（勞聯）都構思發圍，除咗積極吸納會員，仲改革領導層及架構，將工會事務同立法會工作分工，所以早前先頂替李鳳英個位、入咗立法會嘅勞聯主席潘兆平將會全心全力問政，工會事務同主席嘅位就交畀新一姐吳慧儀揸莊。

勞聯日前已經完成領導層改選，喺去年九月新當選勞工界立法會議員嘅潘兆平，同原副主席吳慧儀交換位置，另外兩名副主席就分別由勞工界選委林振昇同譚志聰出任。領導層改革只係第一步，更重要嘅係之後嘅發展。

每月新增一屬會

眾所周知，立法會嘅議政工作愈來愈繁重，如果碰上泛民拉布，議員更須「日以繼夜、夜以繼日」咁開會，潘兆平卸任勞聯主席，既有助佢專注議會事務，更能提升勞聯喺勞工政策方面嘅議政質素。所以，潘去吳上，吳慧儀「坐正」嘅其中一大目標就係加強勞聯內部工作。事實上，吳慧儀今次升任勞聯主席，事先都有迹可尋，早前佢就卸下做咗多年嘅勞工顧問委員會僱員代表，不過轉頭政府又委任番佢做僱員再培訓局成員，公職依然多籮籮。

勞聯明年就迎來成立三十周年嘅慶典，新領導層呢個時候登場，當然都對工會發展有一定期望。據聞，勞聯已訂下目標，希望將會員人數由目前嘅四萬人，喺一年內增加三成至五萬二千人，換言之平均每個月要增加一千人。至於勞聯轄下嘅屬會數目，亦希望由目前嘅九十個增加至一百個，即差不多每月新增一個屬會，呢個一月兩指標，究竟係不可能嘅任務？定係勞而不獲嘅指標？真係要試過至知。