烽火台：此中產不同彼中產

話說某茶餐廳內，兩個睇完法國電影的中產飲住咖啡討論財政預算案。

中產A：弊啦弊啦，不祥啊不祥，福夭啊福夭，曾氏魔咒再現香江！當年貪曾一句「我都係長者」，長者立即受難，短短幾年多咗幾萬貧窮老人。家陣又到鬍鬚曾話自己係中產，跟住落來會發生咩事？小弟諗起都腳仔軟啊。

中產B：計我話，財爺抬舉我哋就真，唔講唔知，原來我同佢同一階級喎。

中產A：唔講唔知，原來中產又有新定義，如果財爺算中產，我哋好明顯係赤貧人士啦！

中產B：唔係呢，我聽人講，月入高過一萬五千元就係中產喎。

中產A：係啊係啊，你又中產，我又中產，我搵三萬元，要用一半收入供樓，你搵萬五元，要用三分一還學債。而台上嗰個中產每月實收三十七萬元，仲要由我哋交稅提供埋官邸、工人同司機。哎，如果物有所值都算啦，卻不知，呢個中產最大嘅成就就係篤數，然後出來喊苦喊忽──死啦窮啊窮啊，唔派得咁多糖啦咁。

中產B：即係咁，當年有中學生問財爺點解香港官員人工高過美國總統，佢答話橙同蘋果唔可以相提並論；家陣財爺自稱中產，亦係此中產不同彼中產，橙同蘋果都係唔可以相提並論嘅！