政壇：政商定格：何鍾泰重情陪友買手袋

立法會前工程界議員何鍾泰，過去十多年議員生涯甚少帶家人出席公開場合，連家庭生活都諱莫如深。仲記得佢講過在任議員時勤力到連大年初一都會返立會工作，但喺剛過去嘅元宵節傍晚，記者就見到佢陪同一對疑似母女嘅女士，喺金鐘太古廣場一間時裝店買手袋。

當兩位女士進入店內選購貨品時，何鍾泰則駐足店外，頭耷耷把玩智能手機，似乎對購物冇興趣，但又不時望向店內，儼如一家之主等候家人購物。當記者上前問吓佢點解唔一齊入店舖時，佢就話只係陪朋友購物，趁空閒用手機睇吓研究報告喎！

佢又話雖然失去議席，但唔代表從此清閒，仍致力政策研究以期喺議會之外繼續服務港人咁話。估唔到佢卸任之後仍然咁忙，就連假日都要抽時間陪朋友購物，睇嚟佢都係着重友情之人，十分難得。