政壇：公文袋變相屈CY捐5萬

公文袋將於四月初舉行籌款晚會，據聞兩年前該黨搞籌款晚宴時，試過搵當時仲係行會召集人嘅特首CY梁振英出席，仲叫佢捐少少錢支持吓。雖然當時CY回覆話無暇出席，但就應承會喺拍賣會上捐出五萬元，託該黨黨員投幅字畫。

喺拍賣字畫環節，有黨員舉咗幾次手代CY出價五萬元投字畫，但當時在座嘅人唔知點解好捨得使錢，兩幅字畫最後都被人以高價投得，令CY乜都投唔到。但該黨事後竟然夠膽追CY找番條數，CY亦冇計咁多，好快就寫咗張五萬元支票打發該黨，不過特首辦對事件不作回應。

至於今年籌款晚會有邊啲政府高官撐場，據聞商務及經濟發展局局長蘇錦樑同財經事務及庫務局局長陳家強都初步應承會出席，但政務司司長林鄭月娥就以公務繁忙婉拒。另外該黨亦有諗過邀請政制及內地事務局局長譚志源，但就擔心如果佢唔得閒出席，到時搵有建仔背景嘅副局長劉江華「替補」，到時都唔知點算好喎！