SUN搞作：少膽虫手記：與才子切磋

最近，淫賤黎喺台灣四圍賣股，少膽虫都寫咗篇評論護主，淫賤黎覺得幾好，所以想同讀者分享吓擦鞋心得：

「經濟學者建議反壟斷法，認為壹全霉老闆賣到股的話，收入好過一般打工仔，向佢徵稅有助減低貧富懸殊，亦可擴闊稅基。少膽虫對此絕不認同。

首先，苛政猛於虎，政府在設立任何一個針對淫賤黎新稅種時，都應該三思再三思。本大師對政府任何撤銷稅項都舉腳贊成，我們怎可建議政府開徵新稅？

第二，倡議徵收稅就真的能收得到淫賤黎的錢嗎？他大可少量賣股，其餘送紅股畀人，或好像現在已常用的給予買家以壹部爛電視代股選擇，讓大小買家取得壹部爛電視後再典當套現，便可輕鬆避稅，令成效存疑。

第三，此舉亦有違台灣發展為全霉負資產管理中心的目標。」

眉精眼企嘅讀者或者會問，點解好似寫得咁少？無嘅，寫多又係收咁多，寫少又係收咁多，唔通寫到「懵橋」咁長咩？其實開會嗰陣，十九才子都睇過，佢就點評：「咁嘅點列式筆記，一味好教條咁講嘢，完全唔打算說服人，只係自己有個地方，就係咁大發議論，實在連會考零分嘅同學仔都唔會咁做……」

少膽虫聽到滴晒汗，但係原來才子挖苦人嘅抽水吸濕力，向來都對外唔對內。「但係老腫寫得出背後嗰種對信念嘅堅持同熱誠，滄桑同悲哀，對夢想可望而不可即嘅惆悵，卻又超越咗佢表面上幼稚嘅技巧，將兩種天真巧妙咁糅合喺一齊。係不可多得嘅佳作！佳作！」淫賤黎一聽，本來都不以為意，都覺得唔係普通擦鞋咁簡單，都罕有地嘉許少膽虫一番。

「切磋吓啫！」少膽虫對才子謙道。計我話齋，最緊要淫賤黎鍾意，老腫個位坐得實淨，寫多一百篇，都無問題啦。