SUN奇古怪:Sun潮語【7 look】

港式粵語粗口同俗語嘅精妙之處,就係字眼內容可以完全無意思,但又絕對做到表達情緒同傳意嘅效果。當中經典例子例如係 「×街」,字面上係一件叉錯腳嘅小意外,但就可以引申到完全唔關係嘅意思上,亦可當名詞、動詞、形容詞、助語詞等使用。另一個例子就係鬧一啲笨人 「7 look」,照字面係完全無意思,但係唔知點解又好似好傳神咁形容一個笨人。

潮語「7 look」除咗係鬧人笨之外,其實都有另外一個意思,就係話人個 「look」好 「7」。 「look」者,好明顯係一個英文,即係外觀嘅意思,亦即係講緊一個人嘅衣着打扮。話你外形或者你個 「look」好 「7」,意思當然係批評你打扮髮型完全唔OK,甚至係老土兼突兀嗰隻,又或者係話人個樣相當憔悴,無厘神氣,亦可用「7 look」去形容。

「7 look」有時亦可寫作 「look 7」,因為在港式粗口裏面,兩個詞係相通嘅,大家都係將笨人比作沒用的陽具。「look」字本身係一個量詞,其實在網上或手機短訊溝通除了「7 look」以外,亦有人更簡單直接用 「76」或 「67」去表達 「7 look」嘅意思。

所以有時喺行街嘅時候見到有啲車牌係167或有67及76之類嘅數字,都令人會心微笑。今時今日,香港地有好多道德塔利班,始終認為用粗口係市井之徒嘅行為,有失斯文,更唔會認同粗口係組成語言文化嘅一部分。所以佢哋一聽到呢啲咩 「7 look」呀 「look 7」呀咁,肯定敬而遠之。

第一手消息請下載on.cc東方互動iPhone/iPad/Android/Windows Phone Apps

廣告人、網台主持 阿東