政壇：搞搞政：高鼎國籲留地發展工業

究竟九龍塘李惠利工業學院用地應該起豪宅，抑或係全幅地畀浸會大學起中醫教學醫院？至今仍爭拗不休，如果當年捐建學校嘅大慈善家李惠利仲喺度，唔知佢會點睇事件呢？

李惠利外孫、香港鐘錶業總會副主席高鼎國前晚出席一個活動時話，公公係香港第一代工業家，為培養香港設計人才，三十六年前豪捐五百萬元興建李惠利工業學院，呢筆錢依家睇嚟濕濕碎，但當年足以買起灣仔成條街喇！後來學院成為香港設計人才嘅搖籃，為香港今時今日引以自豪嘅「設計之都」貢獻良多。

雖然政府已經以一換一嘅形式，用調景嶺地皮換取九龍塘用地，並將學校搬到調景嶺，但曾跟隨公公身邊多年嘅高鼎國話，政府唔應該不斷攞走工業界資源，佢認為唔應該起豪宅，亦唔支持起中醫教學醫院，而係將塊地留番畀工業界發展。

另有工業界老行尊爆料話，當年政府用調景嶺地皮換取九龍塘用地，曾承諾將九龍塘地皮用番喺教育用途，唔係用嚟興建豪宅，否則佢哋就唔會同意換地喎！