政壇：英祿訪港或與兄相聚

政府尋日發出新聞稿，透露「靚女」泰國總理英祿‧西那瓦，將於下周一來港訪問兩日，期間會同特首梁振英喺禮賓府進行雙邊會談。唔知英祿今次來港，除進行官式訪問外，會唔會私下同哥哥、前泰國總理他信見吓面呢？

早年因政變同貪腐問題下台、至今仍流亡海外嘅他信，經常畀我哋影到佢現身香江瘋狂購物同見朋友，舊年更有報道指佢喺香港購入大批豪宅，包括盛傳以約二點一億港元購入山頂一個物業，同埋嗌價五十五億元收購尖沙咀百樂酒店等，但佢就澄清話好多物業都係啲仔女早年喺香港買落，唔屬於佢名下喎。

不過無論幾有錢，返唔到自己國家始終係一大遺憾。佢妹妹英祿承繼兄長當選總理後，曾有報道指他信將有望回國，但最後因各種政治因素而無法實現。如果可以趁今次妹妹訪港，一家人見下面，都總算還咗心願吖！