政壇：政商名人齊撐簡約風

中港兩地肅貪、簡約風氣盛行，就連新官上場嘅中聯辦主任張曉明，前日都喺新春酒會上開宗明義話要「禁收禮」、「減少應酬」。

尋日中華總商會春節酒會上，簡約同肅貪成為熱門話題，中總會長楊釗帶頭話「好Buy」呢套新文化，坦言官員拒受禮，老百姓當然受落。佢又話，香港商界一向守法，即使送禮畀特區政府官員，都有一條界線，唔會越界喎。

中總前會長蔡冠深同行政會議成員羅范椒芬都話係好事，羅太話以前去內地政府大樓，都見到有大果籃，開政協會議期間亦都會收到小禮物，但早前省級政協開會，風氣已經變得好簡約。

同場嘅中聯辦副主任殷曉靜都話，會按主任張曉明嘅要求去做，但坦言以往都有「唔收禮」嘅要求，只係張曉明重申呢個要求啫。