政壇：富貴黨拜年變被開年

每年新春期間，富貴黨都會率領幾十人浩浩蕩蕩去中聯辦（俗稱西環）拜年，之後仲會發新聞稿話邊個主任同佢哋講啲乜。為咗唔畀富貴黨出風頭搶鏡，新上任嘅中聯辦主任張曉明原本約定下星期一同所有建制派議員見面兼拜年，但新年都未到，張曉明就突然取消約會，理由係有事要上京。

既然張曉明下星期唔得閒，富貴黨一行二十人尋日就提早去中聯辦拜年，不過就畀張曉明訓話叫佢哋唔好成日唔聽話。富貴黨榮譽主席田北俊透露，尋日嘅話題主要圍繞張曉明前日喺新春酒會上嚴打貪腐嘅言論，重申唔容許中聯辦人員收受禮物同太貴嘅酒。田少話當時張曉明雖然講得客氣婉轉，但語氣就非常認真，唔似會做幾個月就會放軟手腳。

多次批評CY

富貴黨喺特首選舉期間多次同中央對着幹，之後喺立法會選舉時打住「我哋敢say no」嘅口號，顯示自己唔會盲目聽西環話。

入咗立會後，田少除咗喺泛民對特首CY梁振英嘅不信任動議入面投贊成票之餘，仲成日批評CY「冇料到」。田少承認尋日張曉明叫富貴黨要支持政府施政，又話依家香港社會上唔少人關心「兩制」，但「一國」就冇乜人關心。

不過，神女有心，襄王無夢，田少話相信張主任當時嘅言論只係客氣說話，又話如果市民支持政府，富貴黨當然唔會逆民意而行反對政府。相反，若然市民覺得政府做得唔好，富貴黨就會以「是其是，非其非」嘅態度，喺立法會內投反對票喎。睇嚟張曉明今次雖然畫公仔畫到出晒腸，但富貴黨一於少理扮睇唔到。