衞生黑點超一百 官場急需洗邋遢

年廿八，洗邋遢。香港真係好邋遢o架，邋遢到衞生黑點清洗極都係「劣迹斑斑」。

有政黨收集義工舉報同市民投訴，發現全港衞生黑點多達一百零七個，其中以中西區同元朗係重災區，上榜黑點分別有十五個同九個，主要問題係後巷同垃圾站長年垃圾堆積又污水積聚。觀塘同九龍城亦不遑多讓，個別地點被投訴有人同狗隻隨處便溺，真係人畜同髒，大小同臭，天下「污點」一樣黑。

政黨將衞生黑點資料向食環署舉報，要求當局關注，檢討係咪需要加強執法同提高定額罰款，以收阻嚇之效。

嗱，大街小巷藏污納垢，係咪應該提高罰款阻嚇唔敢講，但講到加強執法咯喎，唔使檢討都知一定要啦。點解後巷淪為垃圾站呀？點解垃圾站變成堆填區呀？就係因為官老爺敷衍塞責，疏於執法囉！

計太一叮話齋，食環署署長梁卓文應該檢討吓自己點解咁失敗就真，搞到地區環境污糟邋遢，又亂又臭。惡劣嘅衞生環境就係一流嘅細菌溫床，衞生黑點遍布港九新界，咁同將市民置身病毒大本營有乜分別？同自毀抗疫防線有乜唔同？家陣新沙士、禽流感、季節性流感輪流作惡，一旦衞生黑點成為病毒孳生同傳播途徑，咁就死得人多！當年一場沙士就奪走二百九十九條人命，萬一慘劇重演，梁卓文剖腹謝罪都唔掂呀！

唉，講起呢張衞生黑點清單，真係好似慈禧太后條紮腳布，又長又臭又污糟。○三年沙士之後，成班高官大鑼大鼓表演一場掃街大龍鳳，矢言掃蕩全港八十六個衞生黑點。點知疫情一過，全部掃把丟晒落垃圾桶，一切又回復舊觀，後巷繼續堆垃圾，橫街繼續積污水，香港繼續做臭港。事隔十年衞生黑點有增無減，咁即係情況無改善到，反而仲惡劣咗，問你死未！唔使講，好了瘡疤忘了痛，懶散官僚梗係同邋遢後巷一樣故態復萌啦！

港府打擊衞生黑點劣迹斑斑，太一叮絕對唔覺得出奇。當年嘅清潔大隊長曾蔭權，今日都成為污染官場嘅過街老鼠啦，一味傍住富豪黐飲黐食，試問由佢帶頭嘅「打黑」運動又點可能成功呢？

咁講啦，除咗貪腐瀆職之外，官僚苟且失職亦係港府一大污點，特首梁振英快快年廿八洗邋遢啦，如果唔係，施政點樣一洗頹風呀，叮！