SUN搞作：打橫嚟講：發揮強國文化，叫鬼佬自卑

中國人，自晚清洋務運動後，便心存崇洋大氣，一直揮之不去，總高視鬼佬文化，永遠看扁自家本土特色，不管跟前有無洋人企立瞪望，都永遠垂頭自卑。

唔知仲要過幾多代，上述那批「中國人」，才可以真真正正強起來？

報載，有個港產香港妹，自詡喺倫敦長大，讀名校，眼見家陣中華人民共和國的有錢太，在餐桌上，連刀叉擺放的禮儀也不懂，飲湯時又SIR SIR洪聲，「有失國體」咁話，遂喺北京開班，培育「國產淑女」喎！查實，超高收費搵食屎橋而已！佢仲講到係「二次文化大革命」，哼！教班大陸婦用西餐刀批削生果（出得起咁多學嘢，仲使自己批生果咩？睇戲時唔講電話、等公車要排隊（等公車？佢司機唔使做呀？）、唔用手指撩鼻孔（好怪！唔用手指撩，咁用乜嘢撩呢？請問！），課程仲分「女主人禮儀」和「淑媛禮儀」……哈！乜女主人唔係要多學兩招腿功（勿心邪），去踢竇捉姦o架咩？「淑媛」？更好笑，喺高級餐館飲湯唔SIR SIR聲，點引到遠處那大腕富豪或貪官留意呢？

強國人民有的是錢，買起你成個歐洲仲得啦！歐洲咁窮，即係證明嗰度啲人唔掂啦！居然，要我哋咁有實力的強國人學啲失敗者？嗱！反過來，係強國人應多啲組隊西征，將令中國強盛的絕技，傳揚給他們。因英國好、中國好，畀機會班洋鬼子同俺家強國接軌嘛！

世上，總有班自以為是的吳三桂主義分子，愛破壞中國傳統文化，成日借機引入唔等使的無聊嘢，令中國人一代代的自形慚愧下去，好不要得！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府