政壇：搞搞政：嫻姐宴長者高官畀足面

工聯會立法會議員陳婉嫻今日起一連三日請班獨居長者喺黃大仙某酒樓食團年飯，特首CY梁振英、政務司司長林鄭月娥、食衞局局長高永文同勞福局局長張建宗就會分三日出席。嫻姐嘅團年飯擺足三日，CY同班高官嚟足三日，可以話畀足面喇。

查實CY上任以嚟可以話一次又一次令工聯會失望。好似最低工資咁，工聯會提出嘅「一年一檢」始終未能如願；長者生活津貼方面，工聯會要求對七十歲以上長者撤銷資產審查，但政府就玩「突襲」。對於工聯會一直爭取嘅標準工時立法，CY喺施政報告中只係話會諮詢，激到嫻姐發晒火，所以難怪會畀人覺得CY同班高官排住隊去賠罪冧嫻姐。

不過，我哋聽聞係因為班長者話好想見CY，工聯會先發出邀請，但出席嘅長者坐埋有成一百圍，酒樓話要分三日擺，但又冇理由叫CY嚟足三日，所以先安排其他高官喺其後兩日出席，仲話成件事同嫻姐發火冇關係喎！