政壇：霍麗萍陪母食晏有手尾

已故全國政協副主席霍英東女兒Pat霍麗萍一向低調，除非係搞個人攝影展，否則好難見到霍家大小姐露面。但佢好錫媽咪，上周三中午十二點幾，搵埋媽媽同兩位好友喺中環食晏。四位女士全程傾偈多過食嘢，傾到重要話題，Pat即時拎本記事簿，戴番副老花眼鏡，細心地Mark低重要資料。

坐咗一粒鐘後，Pat先行離去，留低媽咪同友人慢慢傾。見佢起身後，並無急急腳走，而係將原來屬於隔籬枱嘅櫈推回原位，餐廳職員見狀，一個箭步上前幫手，Pat笑咪咪話：「唔該晒！」真係好有禮貌。