政壇：審議印花稅變騎呢騷

早前多名議員捲入漏報風波，被質疑誠信有問題，佢哋隨即認衰「沙冧」，而立法會負責審議樓市「雙辣招」嘅《 2012 年印花稅（修訂）條例草案》委員會尋日開會，由於涉及樓宇買賣，再加上前車可鑑，有份審議嘅議員都變咗驚弓之鳥，總之係唔係都申報咗先。十幾人輪流申報自己同「物業」有乜嘢關係，令到會議單係搞申報程序，都已經用咗十五分鐘。

張宇人：打算買樓

由於委員會主席李慧琼自己都講唔出條申報界線，所以班議員就索性乜嘢都申報一餐，富貴黨嘅田北俊就話自己從事地產生意，公文袋湯家驊話自己同地產商打過官司，而富貴黨嘅飲食界議員張宇人最玩嘢，話自己打算買賣物業，白鴿黨胡志偉甚至申報佢屋企人持有物業。

最尾連主席李慧琼都要申報埋一份，話自己做緊間會計師行有份做物業買賣。

可能大家對呢條例特別緊張，連用字都突然過晒火位，地產及建造界「大舊石」石禮謙講到印花稅打擊樓市時，就爆咗一句「打擊到買家×街呀!」粗口都出埋，泛民同主席李慧琼都竟然無阻止，亦無裁決大舊石違規。似乎第日社民連嘅「長毛」梁國雄喺議事堂講同一用語，都未必會被趕走喎。

富貴黨就仲緊張，派出喺立法會選舉落敗嘅榮譽主席劉健儀喺公眾席上遙距「控制」田北俊，逢親田少發言，劉健儀即時以短訊發放資料畀田少作補充，都唔知邊個係立會議員。